.

A do të hapen kutitë e votimit pas 25 prillit?! Celibashi jep përgjigjen dhe paralajmëron: Burg 1-7 vite për ata që ndryshojnë rezultatin!

Kreu i KQZ, Ilirjan Celibashi, foli për hapjen e kutive të votimit të 25 prillit, nëse një gjë e tillë do të kërkohet nga një subjekt politik.

Në një konferencë me gazetarët, Celibashi u shpreh se kushdo që do të kërkojë hapjen e kutive, KQZ do t’i hapë dhe do të bëjë vlerësimin e tyre.

Sipas Celibashit, nëse rezultati i këtyre fletëve nuk do të jetë i njëjtë me atë të dalë më parë, do të përballen me sanksione të rënda 1 deri në 7 vite burg përgjegjësit.

“Ka një gjë që dua ta sjell në vëmendje. Me dispozitat e reja të Kodit Zgjedhor është sanksionuar e drejta e çdo subjekti, që qoftë dhe pa asnjë arsye apo shkak të kërkojë hapjen e kutive të votimit dhe të bëhet vlerësimi ose këqyrja e fletëve të votimit për të parë nëse votat janë në përputhje me rezultatin, që kanë konfirmuar komisionerët apo jo. Nëse do të rezultojë e kundërta, ata që do jenë përgjegjës për këtë, ka penalitet shumë të rënda, 1 deri në 7 vite burg.

Dua ta theksoj këtë për t’i hequr çdokujt interesin dhe dëshirën që gjatë procesin të nxjerrjes së rezultatit të demonstrojë në tabelën e rezultatit një rezultat të ndryshëm. Pasi kushdo që do të kërkojë hapjen e kutive të votimit, KQZ do t’i hapë ato fletë dhe do të bëjë rivlerësim të tyre”, tha Celibashi.