Fqinjët e Jetmira Hasanit, e cila u vra mbrëmë nga ish-kunati i saj në oborrin e banesës në Bathore janë shprehur se viktima provokonte vazhdimisht autorin.
Fqinjët shtuan se autori Agron Tanushi nuk ishte person problematik, por prej 10 vitesh kishte sherre të herëpashershme me ish-kunatën, kryesisht për çështje pronësie. Sipas tyre, Jetmira jetonte në katin e dytë të banesës dhe i thoshte Agronit që ishte shtëpia e saj, ndërsa ky i fundit pretendonte se banesa ishte e tija.
Ata treguan më tej se Tanushi ka qëlluar disa herë në ajër pasi ka vrarë Jetmirën dhe më pas është larguar me vrap nga vendi i ngjarjes. Ngjarja e rëndë ndodhi mbrëmjen e djeshme në banesën e Jetmira Hasanit në rrugën “Apollonia” në Bathore.
Jetmira Hasani, prej vitesh jetonte në Greqi, por edhe pse ishte divorcuar me vëllain e Tanushit, sa herë vinte në Shqipëri, jetonte në shtëpinë e familjes Tanushi. Për këtë arsye, mes autorit dhe viktimës, ka pasur shumë herë sherre për shkaqe pronësie.