Bashkimi Evropian thotë se nuk e njeh Aleksandër Lukashenko si president të ligjshëm të Bjellorusisë.

Shefi i politikës së jashtme të BE, Josep Borrell, i tha Parlamentit Evropian të martën (15 shtator) se zgjedhjet presidenciale të zhvilluara më 9 gusht, ishin jo ligjore.

“Situata është e qartë për ne. Ne i konsiderojmë zgjedhjet e 9 gushtit si joligjore. Ne nuk e njohim Lukashenkan si president legjitim të Bjellorusisë”, tha Borell.

Borrell tha se më shumë se 7,500 protestues paqësorë janë arrestuar dhe 500 raste torturash janë dokumentuar.

Ai theksoi rëndësinë e sanksioneve që BE po përgatit kundër Bjellorusëve që besohet të jenë përfshirë në mashtrime elektorale dhe goditje të protestave.

Pozicioni i BE-së bie në kontrast me Rusinë, e cila mbështet qeverinë e Lukashenkos. Presidenti rus Vladimir Putin të hënën përsëriti mbështetjen e tij për Lukashenkon.

Lukashenko fitoi mandatin e gjashtë si president, por zgjedhjet u konsideruan të manipuluara nga opozita.