Kryeprokurorja e përkohshme, Arta Marku dhe kreu i Këshillit të Emërimeve në Drejtësi, Ardian Dvorani e kanë vlerësuar me zero pikë kandidaten për anëtare të Gjykatës Kushtetuese, Marsida Xhaferllari në aspektin morale ndërsa në fushat e tjera e kanë vlerësuar me pikë thuajse minimale.

Por në fund, KED e përfshiu në listën përfundimtare që iu dërguan Presidentit dhe Parlamentit si kandidatura për gjykatën më të rëndësishme në vend.

Në vlerësimet e siguruara nga “Panorama”, shihen vlerësimet me “zero” për meritat morale të Xhaferllarit, nga 18 pikë maksimale.

Edhe në aspektin e reputacionit që gëzon kandidati në shoqëri dhe midis kolegëve, Arta Marku dhe Ardian Dvorani kanë dhënë zero pikë nga 10 pikë maksimale që mund të jepen.

Kjo ka ndikuar në renditjen e saj si e katërta në listë. Pas një procesi të gjatë nga ana e Komisionit të Pavarur të Kualifikimit për kontrollin e figurës së saj, nuk u arrit të merrej një vendim përfundimtar pasi nuk ishte subjekt i vettingut. Zonjës Xhaferllari nuk i janë gjetur shkelje./panorama