Përparim Merdani është kryefamiljari i shtëpisë së grabitur me dhunë dy ditë më parë në fshatin Greshicë të Mallakastrës.
Policia deklaroi se dy të rinj janë arrestuar mëngjesin e sotëm si autorë të grabitjes, teksa është shpallur në kërkim një i tretë.
Në një prononcim për “News24”, Merdani ka treguar se grabitësit kishin hyrë të maskuar, ndërsa kishin pasur thikë dhe shkop gome.
“Dy çunat i kisha në sport, unë isha lart me nënën, mbesa shikonte telenovela. Në një moment na zë gjumi, ata atëherë erdhën. Dëgjova ulërimën e mbesës dhe u ngrita. Ata erdhën me thika tek koka na thanë mos lëvizni”,- shprehet pronari.
Ju kërcënuan?
Përparim Merdani: Mua më qëlluan, më goditi tek hunda, më iku gjak, më është ënjtur dhe syri. Pasi kontrolluan ishte një dhomë me çelës, e shqyen derën e hynë tek dhoma ku kishim lekët, 1 milion e 700 mijë lekë.
I njohët?
Përparim Merdani: Jo ishin me maska nga t’i njihja
Sa persona ishin?
Përparim Merdani: Tre veta, kishin shkop gome dhe thika në duar, m’i mbanin thikat në kokë
I kanë dhunuar nënën dhe mbesën?
Përparim Merdani: Jo ato jo
Jeni ndjerë të kërcënuar më parë?
Përparim Merdani: Jo, jo asnjëherë. I linim dyer e shtëpisë hapur. As kur flija nuk e mbyllja derën e shtëpisë.
E keni dëgjuar se janë arrestuar?
Përparim Merdani: Nuk i njihja fare si persona
Ju punoni zotëri?
Përparim Merdani: Jo pa punë jam
Mund të kenë dëgjuar që keni para?
Përparim Merdani: Po para ca ditësh erdhi vëllai nga Anglia dhe më la disa para për kurimin e nënës. Mund ta kenë dëgjuar.
Ndjeheni të sigurt?
Përparim Merdani: Po këtu s’ka as mbrojtje asgjë, jemi të frikësuar tani.