Shihet si një ndeshje mes dy përfaqësueseve të shteteve që kanë lidhje të ngushta me njëri-tjetrin, por dueli mes Shqipërisë dhe Turqisë nuk ka qenë kurrë “miqësor”, as kur bëhej fjalë për miqësore të mirëfillta. Për herën e fundit që dy skuadrat janë ndeshur në një përballje të tillë pa vlerë pikësh, sfida përfundoi me 1 të kuq të Memushajt dhe 5 kartonë të verdhë.

Që nga ajo ndeshje e fituar 3-2 nga Shqipëria, kuqezinjtë kanë regjistruar vetëm 2 fitore në 9 ndeshje (1 barazim, 6 humbje), duke koleksionuar vetëm 3 gola të shënuar, 2 prej të cilëve në miqësore. Shqipëria shkon në këtë përballje me Turqinë në një formë jo edhe aq të mirë pas fushatës së dobët në Ligën e Kombeve, ndërsa që në pjesëmarrjen në Euro 2016, ka regjistruar në total 13 humbje në 23 ndeshje.

Turqia vjen në këtë sfidë me një seri prej 4 ndeshjesh pa fitore, në të cilat nuk arriti asnjëherë të gjente rrugën e rrjetës (2 barazime, 2 humbje).

Historia flet më shumë për ekipin turk, që ka fituar 3 nga 4 përballjet direkte me Shqipërinë në ndeshje zyrtare duke mos e lënë këtë të fundi tët shënojë. Gjithashtu, bilanci prej 44 fitoresh, 27 barazimesh e 39 humbjesh në kualifikuese e bën Turqinë pak më eksperte. Gjithsesi, bilanci jashtë fushe lë për të dëshiruar. Që nga Euro 2016, ka fituar vetëm 2 ndeshje jashtë fushës së vet, me Kosovën dhe me Suedinë.

Shqipëria, që nga Europiani i fundit, nuk ka pasur një marrëdhënie të mirë me disiplinën dhe kjo shihet nga fakti që ka parë 4 lojtarë të ndëshkohen me karton të kuq në ndeshje e saj. Që nga shtatori i vitit 2016, Shqipëria ka shënuar vetëm 11 gola në 14 ndeshje zyrtare, duke pësuar 21./vipsport.al