Instituti i Shëndetit Publik jep alarmin sa i takon pasojave që mund të shkaktojë fruthi. Eugena Tomini specialiste te ISHP tha se komplikacionet mund të çojnë në humbjen e jetës, ndërsa u apeloi pacientëve të prekur nga sëmundja virale që mos hezitojnë të kërkojnë ndihmë.
Specialistja e Institutit të Shëndetit Publik, Eugena Tomini tha në një prononcim për mediat se nuk duhen neglizhuar simptomat e sëmundjes së fruthit, pasi sipas saj, mund të rezultojnë me pasoja fatale për shëndetin. Sipas saj, komplikacionet e kësaj sëmundje virale janë vdekjeprurëse.

“Aktualisht nuk ka raste të rënda fruthi në vendin tonë. Moshat më të rrezikuara janë ato nën 2 vjeç. Komplikacionet nga kjo sëmundje virale janë vdekjeprurëse. Prandaj mos hezitoni të kërkoni ndihmë menjëherë. Transmetimi viral i kësaj sëmundje është mjaft i lartë. Nuk duhet të harrojmë se jemi në sezonin e gripit”, u shpreh Tomini.

Reagimi i ISHP vjen një ditë pasi një foshnje katër muajshe humbi jetën në pediatrinë e QSUT pasi ishte prekur nga fruthi ndërsa vaksinimi ishte i pamundur. Protokolli mjekësor parashikon vaksinim antifruth për foshnjat mbi një vit.