I ftuar në emisionin “Top Show” në Top Channel kryeministri Edi Rama i pyetur nga një prej studenteve të pranishme në studio për kartën e shëndetit, por edhe për 8 kërkesat u përgjigj se “ne si qeveri jemi të gatshëm të ofrojmë kushte më të mira, edhe të plotësojmë kërkesat. Por për 3 prej tyre kam nevojë që ne të ulemi dhe të diskutojmë”.

“Unë jam Anxhela Bakiasi dhe përfaqësoj vetveten në këtë studio. Për mua nuk duhet të ketë dialog për këto kërkesa. Këto janë kërkesa minimale. Përse unë, edhe pas 4 vitesh nuk e kam ende kartën e shëndetit? Unë e kam kërkuar më parë?”, u shpreh studentja.

“Ndër ato 8 pika, unë kam vetëm 3 për të cilat kam nevojë për diskutim. Të tjerat, si ajo e kartës së studentit, unë jam drejtpërdrejt pro dhe as nuk kam nevojë për debat. Problemi kryesor për studentët në Shqipëri është pikërisht mospërfillja e tyre nga vet universitetet. Përse nuk e ngrini këtë problem ju? Ende nuk e keni kuptuar që juve jeni të papërfillshëm? Mjafton të pyesni studentët e viteve të para apo të dyta, sepse ata që sot janë në vitin e tretë nuk i ka kapur reforma, nëse ndihen me më shumë peshë tani pas reformës së arsimit të lartë apo jo. Ne si qeveri jemi të gatshëm të ofrojmë kushte më të mira, edhe të plotësojmë kërkesat. Por për 3 prej tyre kam nevojë që ne të ulemi dhe të diskutojmë ‘Si?’-në”, deklaroi kryeministri Rama.