Të paktën 5 milionë fëmijë po vdesin nga uria në Jemenin e goditur nga lufta. Foto drithëruese janë publikuar, ndërkohë që organizata “Save the Children” paralajmëroi mbi situatën tragjike.

Një prej tyre është quajtur fëmija skelet, me jetën në rrezik për shkak të urisë. I numërohen të gjitha kockat dhe lëkura është e vetmja gjë që e dallon nga një skelet i vërtetë. Fëmija është fotografuar duke u vizituar nga një mjek në një spital në rrethin verior Abs, në provincën Hajjahut të vendit të varfër. Sipas “Save the Children”, një brez i tërë mund të përballet me vdekjen dhe urinë në një shkallë të paparë në të gjithë vendin, ndërsa çmimet e ushqimit dhe karburantit janë shumë të larta.

Një konflikt trevjeçar midis qeverisë së mbështetur nga Sauditët dhe rebelëve Huthi të lidhur me Iranin, e ka shtyrë vendin tashmë të varfër drejt urisë, duke lënë shumë njerëz të paaftë për të siguruar ushqim dhe ujë. “Miliona fëmijë nuk e dinë kur do të kenë vaktin tjetër për të ngrënë, ose nëse do të munden të kenë ndonjë vakt”, ka deklaruar HelleThorning-Schmidt, CEO i “Save the Children International”.

Kjo luftë rrezikon të vrasë një brez të tërë fëmijësh të Jemenit, që përballen me kërcënime të shumta, nga bombat, në urinë apo sëmundjet si kolera. Gjendja tashmë e tmerrshme humanitare po përkeqësohet nga beteja për portin e lumit Hodeida, e cila po kërcënon të ndërpresë ato pak ndihma që mund të vijnë në vend. Pasi kanë identifikuar tashmë katër milionë fëmijë në rrezik vdekje nga uria, “Save The Children” paralajmëroi të mërkurën se rreth një milion fëmijë të tjerë mund të përballen me urinë kur të përshkallëzojë beteja e Hodeidës.

“Në një spital që kam vizituar në Jemenin e Veriut, foshnjat ishin shumë të dobëta sa nuk kishin fuqi as për të qarë, trupat e tyre ishin të lodhur nga uria”, tha Thorning-Schmidt, sipas AFP. Çmimet e ushqimit në disa pjesë të vendit janë dyfishuar brenda pak ditësh dhe organizata joqeveritare tha se familjet përballeshin me zgjedhje të pamundura nëse duhet të paguajnë për të lënë një fëmijë në spital në kurriz të të ushqyerit e pjesës tjetër të familjes. Një total prej 5.2 milionë fëmijësh në të gjithë Jemenin tani janë në rrezik të urisë, sipas OJQ-së me bazë në Britani.

Agjencia e ushqimit e OKB-së ka thënë se nuk ka shumë kohë për grupet e ndihmës që punojnë në Jemen, për të parandaluar një zi buke shkatërruese. Lufta civile e Jemenit ka shkatërruar aftësinë tashmë të brishtë të vendit për të ushqyer popullsinë e saj prej 29 milionë banorësh. Shifrat e OKB tregojnë se numri i jemenasve që vuajnë nga uria është rritur në 8.4 milionë. Programi Botëror i Ushqimit vitin e kaluar paralajmëroi se ushqimi ishte bërë një “armë lufte” në Jemen, ku luftimet, kolera dhe uria kanë krijuar atë që OKB e quan krizën më të keq humanitare në botë.