Sa herë kryeministri kalon nëpër situata të sikletshme, reciton me tone të forta fjali të hartuara bukur, për efektet që do të japë reforma në drejtësi. Madje kur i duhet e kthen edhe plagën e hershme të socialistëve, 21 janarin, dhe çfarë do të bëjë drejtësia e re që do të vijë pas reformës, me zbardhjen e 21 janarit, Gërdecit e të tjera çështje si këto. Kështu ndodhi edhe në fjalën e tij sot në parlament, ndërkohë që rrugët e Shqipërisë ishin bllokuar nga protesta e opozitës, që ka startuar kështu mosbindjen civile. Për të gjithë ata që e akuzojnë se ka harruar 21 janarin, Rama ka këtë përgjigje: Kujt më thotë që ju e harruat atë që thatë që do shkojnë përpara drejtësisë që bënë 21 Janarin e Gërdecin i them: më merr te keqen, sepse jo vetëm që nuk e kemi harruar por kemi ndërmarrë reformën më të fortë që do vendosë në shina një sistem drejtësie që do marrë përpara ata që i ngulin çdo ditë thikë pas shpine këtij vendi”.
Por gjatë ditës së sotme, janë publikuar lajme që e vënë në dyshim të fortë reformën në drejtësi. Organizata amerikane, Judicial Watch, ka publikuar së fundmi një dosje ku sipas organizatës vërtetohet se si miliarderi George Soros përfitoi nga paratë e taksapaguesve amerikanë për qëllimet e tij politike në Shqipëri. Pas një hetimi të detajuar, Judicial Watch ka dosjen me 32 faqe ku supozohet se “Fondacioni për Shoqërinë e Hapur” në Shqipëri u vu në shërbim të Partisë Socialiste në pushtet dhe kryeministrit Edi Rama për të justifikuar mënyrën se si po bëhej reforma në drejtësi. Dokumentet e përfshira në këtë dosje evidentojnë se 9 milionë dollarë i janë dhënë SOROS-it nga taksapaguesit amerikan, për të sponsorizuar kryeministrin Rama në Shqipëri. Dosja e Sorosit në Shqipëri, është pjesë e hetimit të zgjeruar të Judicial Watch, me qëllim për të hedhur dritë se si u shpenzuan paratë e taksapaguesve amerikanë për qëllime politike të administratës së ish-presidentit, Obama.
Dokumentet e publikuara në këtë dosje hedhin hije të forta dyshimi për seriozitetin e reformës në drejtësi në Shqipëri.