.

Shtohen tensionet/ Pas helmimit të ish-spiunit rus në Britani, BE tërheq ambsadorin në Moskë

Edhe Bashkimi Europian ka tërhequr ambasadorin përfaqësues të unionit në Moskë.
Këshilli Europian ka dënuar sulmin e bërë pak kohë më parë ndaj ish-spiunit rus në Britani dhe shprehu bindjen se pas sulmit kimik ndaj Sergei Skripal dhe vajzës së tij në Britani fshihet Rusia.
“Këshilli shprehu solidaritetin me të gjithë personat, jetët e të cilëve janë kërcënuar dhe garanton mbështetjen për hetimin në vijim,” shprehen liderët europianë.
Kryeministrja britanike Theresa May urdhëroi përjashtimin e 23 diplomatëve rusë në përgjigje të sulmit të 4 marsit ndaj Skripal dhe të bijës, Yulia. Lëvizja çoi në reagimin e njëjtë të Moskës, që vendosi përjashtimin e diplomatëve britanikë nga vendi.
Për më tepër, Rusia mohoi përfshirjen në sulmin që ka krijuar një tjetër krizë madhore në marrëdhëniet tashmë të tensionuara mes Perëndimit dhe Moskës.

Edhe shtete të tjera anëtare të Bashkimit Europian po konsiderojnë mundësinë e përjashtimit të diplomatëve rusë nga vendet e tyre, gjë që shënon një fitore për kryeministren May, e cila merr mbështetje në shkallë të gjerë ndërkohë që vendi i saj negocion daljen nga unioni.