Teksa ishte i ftuar në emisionin “Pasdite në Top Channel”, aktori i njohur i humorit, ai që na ka bërë të gjithëve të qeshim me lot ka rrëfyer se ndjen mall për skenën e ‘Portokallisë’.
Bëhet fjalë për Erand Sojlin, ai jeton në Amerikë, ku edhe po punon për një project filmi në SHBA.
Sojli tha se nuk do e harrojë asnjëherë ‘Portokallinë’ dhe se vazhdon ta ndjekë edhe nga Amerika.
“Vazhdoj ta ndjek Portokallinë, në Amerikë i bie të transmetohet në orar dreke. Mbaj mend kur më zgjodhën Agron Llakaj dhe Altin Basha. Unë nuk i shikoja dot ata që po më dëgjonin, por vetëm dëgjoja të qeshurën e Agron Llakajt”, kujton Erandi.
Aktori i mirënjohur nuk harron edhe njeriun të cilit i takon merita që shqiptarët qeshin çdo të diele.
“Merita i takon njeriut të madh, Dritan Hoxhës. Me këmbënguljen e tij që ne të ishim më të mirët, duke na plotësuar çdo kusht, edhe mbi nevojat tona, ne u bëmë makina që prodhonim humor në Shqipëri”, deklaroi Erandi.
