Presidenti i Shqipërisë Ilir Meta ka dhënë një intervistë ku ka reaguar për deklaratat e Presidentit të Greqisë, Prokopis Pavlopulos në lidhje me çështjen çame dhe veton në BE kundër anëtarësimit.

Meta tha për Albanian Daily Neës se qëndrimet e tij nuk sjellin energji pozitive.
“Pavlopulos, jo në sintoni me Bushatin e Kotzias. Deklaratat e tij nuk i përgjigjen partneritetit. Të ruajmë qetësinë dhe respektin reciprok”, ka deklaruar Meta.

Pak ditë më parë, presidenti grek, Prokopis Pavlopulos me tone aspak diplomatike i ka bërë thirrje Tiranës të respektojë ligjin, të drejtat e njeriut dhe të pronës, si dhe të drejtat e pakicës greke në Shqipëri.

Gjatë një vizite në Shtabin e Forcave Ajrore në Larisa, presidenti grek e cilësoi çështjen çame si pjesë të mizorive naziste gjatë Luftës së Dytë Botërore, njofton media greke ERT.gr.

“Është e pakonceptueshme që udhëheqja e Shqipërisë të ngrejë çështje çame. Përveç faktit se kjo çështje nuk ekziston, është më mirë që Shqipëria të mos kujtojë se çfarë do të thotë historia e të ashtuquajturave çamë gjatë periudhës së mizorive naziste në Greqi. Nëse dëshiron të ketë ndonjë perspektivë evropiane. Më vjen keq që jam i drejtpërdrejtë, por në ditë të tilla si kujtimi i holokaustit ata guxojnë të flasin për çamët. Më mirë të mos kujtojmë historinë e atyre që u shfaqën si çamë në hapësirën greke. Respekti për historinë është baza ndërkombëtare për miqësinë dhe fqinjësinë e mirë”, tha Pavlopulos.